Internetvandræði heimilisins og fjölmargar tegundir af leti valda því að hinn týndi sonur Gettu Betur-bloggsins snýr ekki aftur fyrr en nú. Og hvílík dásemd það er fyrir þau 0,0003 prósent þjóðarinnar sem eru keppendur í Gettu Betur að geta leitað til völvu völvanna, Klingenberg Klingenberganna, já til Nostradamusar sjálfs – því enginn er færari að spá fyrir um komandi keppnir heldur en litli strákurinn sem felldi tár í beinni útsendingu vegna þess að hann tapaði í Gettu Betur, og skal engan undrast. Því Gettu Betur er keppni sem alvarlegir menn, eins og ég sjálfur, taka alvarlega. Eða við þykjumst gera það a.m.k.
Keppnin í ár verður mjög tvísýn. Af þeim fjórum liðum sem kepptu í undanúrslitum í fyrra (og voru einfaldlega fjögur langbestu liðin að mínu mati) er aðeins eitt með óbreytt lið, eftir því sem ég kemst næst. Þar er ég að sjálfsögðu að tala um segulinn sem dregur að sér hinn ógnvænlega bráðabana, MK.
Þeir hefðu átt að vinna í fyrra ef keppnisíþróttir væru dæmdar af sanngirni en ekki stigafjölda. Kópavogsmenn eru einstaklega duglegir og fékk ég símtal frá einum slíkum snemma í haust þar sem óskað var eftir æfingakeppni – þá vorum við vart búin að skipa nýtt lið. Þeir, ásamt MR-ingum, eru án efa liðið sem verður erfiðast að sigra. Rétt eins og Liverpool er stórveldi enskrar knattspyrnu er MR stórveldi þessarar keppni. Ég hata að segja það en það er bara satt. Þeir verða sigurstranglegir í vetur, sem fyrr. Lið þeirra inniheldur mann sem vann Meistara Loga Bergmanns þar sem núverandi dómari Gettu Betur komst í undanúrslit! En þar með er ekki sagt að þeir vinni örugglega. Magnús skal vita það sem arftaki hins mikla meistara Jónasar Helgasonar að sá maður komst ekki lengra í Gettu Betur en einu sinni í undanúrslit á þremur árum. Einnig misstu þeir sinn sterkasta mann frá síðasta ári, þó nýliðinn Vignir (sem var liðsstjóri á síðasta ári) sé eina breytingin á liðinu. Nágrannar mínir í Versló eru óskrifað blað. Árni, Ásgeir og Hafsteinn hafa allir snúið sér að öðru, svo best sem ég veit, þrátt fyrir að allir séu þeir enn nemendur skólans. Því mun lið þeirra skipa þremur nýliðum í fyrsta sinn í langan tíma. Síðasta undanúrslitaliðið í fyrra er auðvitað mitt eigið lið. Eftir að tillaga mín um að vera einn í liði var samþykkt heyrðist lágvært Veto úr horni og því fundum við tvo nýliða. Mér þykir mjög leiðinlegt að segja það en í fyrsta sinn frá því snemma á síðasta áratug er engin stelpa í Gettu Betur-liði MH. Við reyndum og reyndum og okkur langaði svo ótrúlega mikið en við einfaldlega gátum ekki með góðri samvisku haft stelpu í liðinu. Það voru tvö sæti laus og eina frambærilega stelpan sem hafði áhuga var að okkar mati afgerandi þriðja best. Þess í stað er stelpa í þjálfaraliðinu, og ekki veit ég um mörg lið sem státa af því. Karlaveldið í Hamrahlíðinni mun aftur á móti ekki vara lengi því tveir okkar útskrifast í vor, og ég get nánast lofað stelpu í liðið á næsta ári. Fleiri lið eru auðvitað í keppninni. Helst skal nefna lið eins og MA sem verða með sama lið og tapaði naumlega fyrir Versló í fyrra og Borgó, sem áttu ekki sinn besta dag gegn okkur í 2. umferð fyrir ári. Af þessum liðum held ég að MR og MK ættu að vera í sérflokki. Versló gætu vel verið sterkir þó lítið sé hægt að segja til um það. Sömuleiðis veit ég lítið um hversu góðir við í MH erum gagnvart öðrum liðum. Persónulega er ég spenntur fyrir MA sem gætu vel strítt sterkustu liðunum en hef aftur á móti ekki jafn mikla trú á Borgó. En þá að keppnum kvöldsins.
Menntaskólinn í Reykjavík – Verkmenntaskóli Austurlands, Neskaupsstað Hinn meinti MR-hroki mun blómstra að rústi loknu. Fjölbrautaskólinn í Garðabæ – Menntaskólinn á Ísafirði Ísfirðingar stóðu sig ekki illa gegn Verslingum í fyrra, hvort þeir séu með sama lið veit ég ekkert um. Garðbæingar missa hins vegar einn, sem var þó ekki þeirra besti maður. Þó FG standi ekki beint nærri hjarta mínu þá verð ég að leyfa Garðbæingum að njóta vafans, enda er ég slíkur sjálfur. Svo væri bara svo gaman að mæta þeim sjálfur.
Fjölbrautaskóli Norðurlands vestra – Menntaskólinn að Laugarvatni FNV urðu fyrsta fórnarlamb MK í fyrra (þó MK hefðu þá aðeins tekið 8 stig í hraða), töpuðu stórt og voru arfaslakir. ML voru einnig slakir, töpuðu fyrir lélegri Flensborg í fyrstu umferð. ML voru ögn sterkari þá, hafa meiri hefð fyrir keppninni og hljóta því að vinna í kvöld.
Verzlunarskóli Íslands – Fjölbrautaskóli Snæfellinga Versló mun vinna, sama hversu nýtt lið þeir eru með. | 
